Acara Partangiangan 24/25 Maret 2020
- Saat teduh
- Marende sian BE 23 : 1 -2
Jesus, hami ro dison, asa masihangoluan
Ipe roma Ho tu son, jala baen ma pardomuan
Ni tondiM tu tondinami, unang mampar rohanami
Holom rohanami be nang parbinotoannami
Molo so ro tondiMi manondangi rohanami
Ingkon Ho do paturehon dalannami sidegeon
- Votum
Marhitehite Goar ni Debata Ama dohot Goar ni AnakNa, Tuhan Jesus Kristus dohot Goar ni Tondi Parbadia, na tumompa langit dohot tano on. Amen. Luluhon ma ahu, ale Debata, jala parbadahon badangku dompak bangso na so daulat roha, sai palua ma ahu sian baoa siulahon sipaotooto dohot hajengkelon. Ai Ho do Debata haroroanni hagogoonku. Tongos ma hatiuronMu dohot hatigoranMu, angka na manogu ahu, pataru ahu tu dolok ni habadiaonMu dohot tu ingananMu. Haleluya.
Martangiang ma hita. Ale Tuhan Debata, Amanami na dibanua ginjang, Parasi roha na sumurung! Na mandok mauliate ma hami tu Ho sian nasa rohanami, ala dilehon Ho AnakMu na sasada i tu hamatean humophop hami, asa unang mago na porsea di Ibana, alai asa hangoluan na saleleng ni lelengna di nasida. Tatap ma hami, ale Amanami di bagasan AnakMu Jesus Kristus, na gabe habadiaon dohot hatigoran di hami. Sai sesa ma dosanami saluhut ala ni pelean na sun denggan, na pinelehonNa i homophop hami. Sai paeleng ma pinggolMu tu tangiangnami jala asi ma rohaM di hami marhitehite AnakMu, Tuhan Jesus Kristus, Tuhannami. Amen.
- Epistel
Turpuk epistel sian 2 Petrus 1 : 1 – 9. Tajahama secara responsoria
(P : Pemimpin J : Anggota Keluarga)
P : Ahu surat ni si Simon Petrus, naposo jala apostel ni Jesus Kristus, mandapothon angka naung manjalo haporseaon na arga, rap dohot hami, marhitehite hatigoran ni Debatanta dohot Jesus Kristus, Sipalua i:
J : Singkop ma di hamu asi ni roha dohot dame, marhitehite panandaonmuna di Debata dohot di Jesus, Tuhanta i!
P : Dilehon hagogoon ni hadebataonna i do tu hita nasa na tau hangoluan dohot hadaulaton marhite sian naung tatanda Ibana, na manjou hita, hinorhon ni hasangaponna dohot hadengganonna sandiri.
J : Marhite sian i do dilehon tu hita bagabagana angka na arga jala na balga situtu, asa hinorhon ni i gabe partohap hamu di hadebataon, dung sanga maporus hamu sian hamagoan, na di bagasan hahipason na di portibi on.
P : Dibahen i, haringgashon hamu ma sian nasa gogo, manurdukkon denggan ni parange di bagasan haporseaon i, dung i habisuhon ma di bagasan parange na denggan i;
J : dung i pangajarion diri ma di bagasan habisuhon i, dung i habengeton ma di bagasan pangajarion diri i, dung i hadaulaton ma di bagasan habengeton i;
P : Dung i holong ni roha di dongan na dibagasan hadaulaton i, dung i holong ni roha di na saluhut na ma di bagasan holong ni roha di dongan i!
J : Ai molo jumpang angka i di hamu jala ganda, ndada loasonna hamu losok jala so marparbue, laho mananda Jesus Kristus, Tuhanta i.
P : Alai molo so dapot i di na deba, halak na mapitung ma i, parmata na jonok, naung lupa di haiason sian dosa, na di ibana najolo. I ma sahat na. Martua do angka na tumangihon Hata ni Debata, jala na umpeopsa. Amen.
- Marende sian BE 180 : 1 + 3
Ro tu Jesus, ho na loja na maheu i,
Lam lumbang do di lambungNa rohami
Timbang holong ni rohaNa, na sai godang i,
Ai dilehon do hosaNa, tobusmi.
- Jamita : Sepania 2 : 1 – 3
Di ari na parpudi on, lam tubu do sahit na ginoaran, “dangoldangol sisilon dohot naso umboto na maila” na marhadomuan tu ngolu partondion. Nunga lam tu dorasna manosak ngolu ni jolma sian horong dakdanak sahat tu na tumua. Tarlumobi ma i siala pangontak ni ngolu pardagingon siganup ari lam manosak ngolu ni jolma i. Tarlumobi ma di na lam tu argana angka ragam ni situhoron na ringkot di ngolu siganup ari. Tung mansai maol do angka jolma di partingkian on mangotapisa, gabe dipapeol ma uhum dohot hasintongan di saluhut parulaonna asal ma mangomo jala adong di ibana. Gabe lam tubu ma biar ni roha na lam tu bagasna. Nang pe naung jotjot marsaringar hata ni Debata na mandok, “Ala ni i do umbahen na hudok tu hamuna: Unang holsoan hamu hosamuna sumarihon sipanganon, manang dagingmuna pasarisari parabiton! Nda ummarga do hosa sian sapanganon? Nda ummangat daging sian parabiton” (Mateus 6:25), alai lam balga do tubu ganggu ni roha dibagasan roha dohot pingkiran ni jolma i. Hira alogo sambing nama i di rohana. Ganggu dohot biar ni roha i gabe patubu lam tu losokna jala ndang malungun be mangalului Tuhan i. Jotjot nama gabe hasomalan sambing na mamuji Debata. Ai ndang tarida panghorhonna mangoloi hata ni Debata di ngolu siganup ari. Gabe hira tudosan na nihatahon ni Jesus taringot partubu ni boni na sinaburhon tu parsihupian, alai anggo na sinaburhon tu parsihupian i, i ma na umbege hata i, gabe pangkolsohonna di angka na di hasiangan on dohot hamoraon sipangansi i do mamisati hata i, jadi ndang saut be marparbue. Gabe tarida ma pangalaho na dangoldangol sisilon mangalului Jahowa di ngoluna. Ala ni i ma jamita on manogihon hita asa rade laho paubahon roha asa unang sahat uhuman ni Debata na naeng pamasaonna tu angka na mardangoldangol dohot na so umboto na maila.
Disungguli jamita on do hita di partingkian na songon on, asa unang lalap diparlalapan mandalani ngolu na pasiding hasintongan dohot uhum ni Debata. Nang pe naung tangkas di paboa uhuman ni Debata tu nasida, tongtong do disosohon panurirang Sepania tu angka na mardangoldangol dohot na so umboto na maila i, na ungkap dope pintu parasian ni Jahowa manjangkon nasida. Anggiat tarsunggul roha nasida songon bangso ni Debata di saluhut parulaon nasida na sai laon. Tangkas do dipabotohon di ayat 3 i, na gabe persoalan di ngolu ni bangso i, i ma uhum, hasintongan dohot ginjang ni roha. Torop nasida mangeahi arta hamoraonna na pasidinghon uhum dohot hatigoran na himalomohon ni Debata. Jotjot dipapeol uhum laho mangalului pangomoan sambing. Sai hira na mangurupi hape nunga pamatehon. Sai hira na pasintonghon hape nunga mandao sian hasintongan ni Debata. Panghorhonna, gabe tubu ma ginjang ni roha, siala dihaporseon ibana, malomalona sambing do patupaho i gabe mamora dohot maduma ibana. Ndang disadari ibana i nunga gabe hamagoan di ibana siala maralo dohot na hinalomohon ni Debata.
Ala ni i ma dipaingot jala disosoi panurirang Sepania nasida songon bangso ni Debata, asa na mangalului Jahowa dibagasan pangantusion; pasiding parsombaon tu ganaganaan, pasiding pangarupaon tu dongan jolma, mangaradoti uhum, mangalului hatigoran dohot lan angka na asing. Mangalului Jahowa ndada holan mangulahon parsombaon tu Debata sambing. Diondolhon panurirang i do mangaradoti uhum dohot hasintongan i do gombaran ni na mangalului Tuhan i. Pola sahat tu tolu hali disosohon panurirang dohot hata: Lului ma..., lului ma..., lului ma. Mangondolhon tu nasida asa manghangoluhon uhum dohot hasintongan tu donganna jolma. Parsaoran na denggan dohot dongan jolma; padaohon pangarupaon dohot ginjang ni roha, i do na gabe hataridaon na mangalului Jahowa dibagasan uhum dohot hasintongan.
Sipahusorhusoron sian jamita on :
- Di partingkian na lam tu bahatna tubu ragam ni angka hamaolon no sonson di jolonta, naeng ma tongtong dungo hita mangaradoti haporseaon dohot managkasi saluhut parulaonta naung tapatupa. Ai ndang marlapatan pamujionta tu Debata, molo marasing parulaonta siganup ari hombar tu na hinalomohon ni Debata. Hamamago dohot hasusaonta do i muse.
- Naeng ringkot hita manghangoluhon uhum dohot hasintongan ni Debata songon hataridaan ni parsitutuonta mamuji pasangaphon Ibana. Ingkon tangkas ma SOP (Standart Operasional prosedur) hombar tu na hinalomohon ni Debata. Unang ma ala na ringkot dohot na manosak gabe ta pasiding uhum dohot hasintongan ni Debata, gabe asing LPJ (Laporan Pertanggung Jawaban) sian SOP naung ditotophon Debata.
- Paubahon roha mulak tu Debata, ingkon jumolo do jumpa habengeton ni roha di hita mandalani ngolu on. Bertobat dan berubah serta belajar juga hanya dapat dilakukan oleh orang-orang yang randah hati, yang mengakui dirinya tidak sempurna.
Sai dipargogoi Debata ma hita mangulahon na hombar tu hataNa. Amen.
- Marende sian BE 723 : 1 + 3
Tu joloM O Tuhan sahat ma diringkon
Pangke ma au hombar tu lomoM,
Molo ndang Ho Tuhan, maringanan di au,
Diringkon ndang mararga be i
Reff : Tung pogos pe dison manang sonang tahe
Marsigantung tu Ho sasude
Holan Ho huihuthon ndang be diringkon
Togutogu ma tu na ture
Tu joloM O Tuhan sai gara rohangkon,
Tung unduk do mangoloi Ho
TondiMi ma tongtong margogoihon au on,
Mangulahon lomo ni rohaM
Reff : Tung pogos pe dison manang sonang tahe
Marsigantung tu Ho sasude
Holan Ho huihuthon ndang be diringkon
Togutogu ma tu na ture
- Tangian sian anggota keluarga
- Marende sian BE 118 : 1 – 2
Paian ma di hami, o Jesus, asi Mi,
Asa tung unang hami dian si musu i.
Paian, Tuhannami, HataM di hami be,
Asa martua hami, nuaeng nang sogot pe.
- Tangian sian Kepala Keluarga
- Marende sian BE 214 : 1 (papungu pelean)
Sonang di lambung Jesus, sonang na ro tusi;
Unang be ho mabiar lao mandapothon i!
Tongtong di jouhon Jesus:
Sai ro ma tu Au tadingkon haholomon jala haposi Au
Sonang di lambung Jesus, sonang na ro tusi;
Unang be ho mabiar lao mandapothon i!
- Tangiang panutup
Tatangianghon ma peleanta :
Ale Debata, Amanami na di banua ginjang, Ho do haroroan ni saluhut silehonlehon na denggan dohot nasa ulibasa na mauliutus. Hupasahat hami ma sian na nilehonMi tu hami, peleannami tu Ho. Sai jalo ma i gabe uap na hushus di joloM. Pasupasu ma i jala ramoti asa huparhaseang hami pelean on, patimbulhon harajaonMu di tongatonga ni HuriaM dohot portibi on. Buhai ma rohanami marhitehite TondiM, asa lam hutanda hami godang ni silehonlehonMi tu hami, asa lam girgir hami mandok mauliate tu Ho, marhitehite Jesus Kristus Tuhannami. Amen.
Rap ma hita di tangiang hatopanta i. Ale Amanami na di banua ginjang! Sai pinarbadia ma GoarMu! Sai ro ma harajaonMu! Sai saut ma lomo ni rohaM di banua tonga on songon na di banua ginjang! Lehon ma tu hami sadarion hangoluan siapari! Sesa ma dosanami songon panesanami di dosa ni dongan na mardosa tu hami! Unang hami togihon tu pangunjunan! Palua ma hami sian pangago! Ai Ho do nampuna harajaon dohot hagogoon ro di hasangapon saleleng ni lelengna. Amen.
Komentar
Posting Komentar