Partangiangan 31 Maret 2020

     Partording ni Partangiangan Keluarga 

HKBP JAMBI 1 

             Selasa,Rabu / 31 Maret-01 April 2020 

      Topik : Ida Ma Na Ro Do Rajam

Ibadah

1. Marende BE. 200 : 1 + 3    “Di Surgo do Alealenta”    BL. 106

2. Votum / Introitus / Tangiang 

U    :    Marhitehite Goar ni Debata Ama dohot Goar ni AnakNa, Tuhan Jesus Kristus dohot Goar ni Tondi Parbadia, na tumompa langit dohot tano on. Amen.

        Asi ma rohaM di ahu, ale Jahowa, ai targogot do au, maras do rohangku dohot tondingku. Alai anggo au, tu Ho do ahu marhaporusan, ale Jahowa, ningku : Ho do Debatangku.

Kel.    :    Marguru tu tangaMu do angka parsorionki, sai palua ma ahu sian tangan ni musungku dohot sian angka na mangalatongi ahu

U    :    Ale Jahowa, sai unang paurak ahu, ai Ho do na hujou, sai palua ma ahu marhitehite hatigoranMu. Haleluya 

        Martangiang ma hita, : “Ale Tuhan Debata, Ama ni saluhut parasirohaon! Nunga ditatap Ho hami bangsoM on, ai ndang manjua Ho mangalehon AnakMu na sasasa i, Tuhan Jesus Kristus tu tangan ni pardosa, asa taonnonNa haleaon dohot siak ni bagi sahat ro di hau na pinarsilang. Sai tumpahi hami marhitehite asi ni rohaM, asa margogo hami jala marbenget ni roha songon anak haholongan ni rohaM i di angka sitaonon, asa marsangap GoarMu dohot AnakMu, Tuhan Jesus Kristus, dohot Tondi Parbadia marhitehite hami. Amen.

3. Marende BE. 733 : 1 – 2     “Dulo Ma Au On O Tuhan”        BL. 733

4. Epistel : Johannes 12 : 12 – 19

(Turpuk di jaha marsorinsorin, Molo dung sidung dijaha marsorinsorin, ditutup na manguluhon ma mandok : “Ido sahat na. “Martua do na tumangihon Hata ni Debata jala na umpeopsa. Amen”)

5. Marende BE. 747 : 1 - 2    “Sai Hunangkohi Dolok I”        BL. 747

6. Jamita : Jesaya 52 : 7 – 12

(Dibuhai ma marhite Tangiang, Dungi dijaha ma Turpuk Jamita laos diuduti ma tu Hatorangan ni Jamita”)

Ida Ma Na Ro Do Rajam

Holong ni Debata do na dipaandar di bagasan turpuk on, dipatolhas do panurirangon on tu halak Juda na tarbuang tu Babel, ndung dilengsehon Babel Jerusalem, ndang be mardalan Pemerintahan, Bagas Joro pe nunga marongso jala ulaula  ni Bagas Joro di boan tu Babel. Ndang di halomohon Debata nian uhum i madabu tu bangsoNa.

Molo dipaloas Debata angka bangso na humaliang pasingkam pasorin manaluhon bangso Juda, lumobi halelengse ni Jerusalem dibahen Raja Nebukadnezar sian Babel, ndang na so margogo Debata mangondingi  bangsoNa i. Sian sude pardalanan ni bangso Israel dohot Juda, lumobi uhuman na masa tu nasida, tangkas do disi adong sangkap ni Debata, ima asa tung ditanda nasida Debata. Jotjot tarhirim Debata di pangalaosion nasida.

Marhite holongna, ingkon saut do padan ni Debata, sai maulakulak do dipatuduhon Debata holongNa tu nasida. Di ayat 7, didok “lehetna I” (Betapa indahnya kelihatan), mangondolhon naeng tangkas mangondolhon parsuruon ni Debata tu Parbarita Na Uli. Marhite pandohan i sai hira na dialusi do soara ni sipartangiang na tarsurat di ende hananagkok i : “Sai mangaranapi do matangku dompak angka dolok : Sian dia do ulaning ro pangurupion tu ahu? Sian Jahowa Sitompa langit dohot tano sambing ro pangurupion tu ahu” (Psalmen 121 : 1 – 2). Mandele do bangso i  di habungan i, angka hata naung binegenasida, isarani : inganan na badia, Jerusalem na jongjong di atas dolok Sion, bagas joro inganan Kehadiran ni Debata, harajaon ni si David hot salelenglengna, hira so adong lapatana, ai nunga diluntak na leban saluhutna. Gabe adong do deba sian nasida ndang be porsea tu Debata, gabe patupa parsombaon tu na leban. Marhite panurirangan on, dipaingot asa unang mandele. Nang pe masa sude i, ndang na mintop padan ni Debata.  

Alani i Debata marhite panurirangNa maningtinghon haluaon nasida sian parhatobanan jala mulak boanonNa na tarbuang, marsada muse di tano naung niuarihonNa, ingkon nasida nampunasa i muse. Dipahehe Debata do sada harajaon, ima Asyur papatu Babel, jala naeng paheheon ni Debata ibana mamboan bangso i mulak tu Jerusalem jala laos harajaon Asyur marhite Raja Kores mangalehon partingkian laho paulihon bagas joro Debata na marongso i. Hot do padan ni Debata, nang pe ingkon mangae nasida di parhatobanan Babel saleleng 40 Taon. Debata do na patupa haluaon. Ibana do Raja na mamboan dame dohot haluaon tu bangsoNa nang tu saluhut bangso.

Asa sahat tangkas hata bagabagaon tu nasida, somalna diendehon nasida do on di tingka peribadatan. Laos digubah do dibagasan ende pujipujian nang angka pambahenni Debata di pardalan ni bangso i, lumobi haluaon sian Misir (ay. 4). Marhite na manaringoti muse pangaramotion ni Debata, naeng ma nian, hehe semangat dohot panghirimonta di angka ngoluntabe.

Tarlumobi di partingkianta sinuang on, na mangadobi “Pandemik Virus Corona” na mambahen torop halak di portibion nang di bangsonta on agoan hosa. Jala, mansai tangkas do nang pangontakna di sude gulmit ni ngolunta. Tardok “Dibagasan Tahutan portibion”, laos boi do dohononta, sisada pangidoan do sude hita on, asa salpu na masa on. Asa jumpang muse ulaon na denggan “Marparsaoran, Marpanindangion dohot Marasiniroha” songon hasomalanta di ulaon na denggan i. Ingkon tarajumi do manang aha na masa dingolunta, tongtong hita dibagasan Tuhan i. Unang sumurut gogonta ala ni holsonta. Unang gabe holsonta patubu sahit di hita. Ingkon pos do rohanta tu Tuhan i, “Badai pasti Berlalu”. Ingkon tarajumi do, dibagasan pangaramotion ni Debata do hita, jala tongtong hita manjamothon hahiason, hahipason, dohot tongtong dibagasaan ngoluna na daulat.  Alani i, boha do hita manguduti ariarinta di rura partangisan on :

• Paringas dirim mamaritahon Barita Na Uli.

Molo tapahombar partingkian si nuaeng on, boi do hita patulushon ulaon Parbarita Na Uli  dibagasan “Jaga Jarak”. Balga do huaso ni Debata di hita, jala Tondi do anggo Debata, ndang boi Debata di batasai ruang manang partingkian. Molo pe dijamothon hita jaga Jarak, alai adong do na boi tapangke mamaritahon barita Na Uli, marhite era Industri 4.0. Sada siulahononta, angka “Barita Na Uli” ma tapatolhas di angak Media Sosialta. Ingkon jamot hita di Informasi na tasagihon. Jolo manat hita, ai unang asal “Copy baru Share” so pola manjamothon. Asa unang  gabe parbarita “Hoax' hita. Tajamothon ma angka Media sosialta asa tongtong, manungguli donganta diulaon na denggan i. 

Jala marsaringar do dipartingkiaon on Ibadah melalui “Live Streaming” nang pe on “Kondisional”, ndang gabe si legalhonon gabe tadok tumagon do Ibadah Live Streaming. Ibadah tongtong do dibagasan Marparsaoran (Huria). Tongtong ma hita patubegehon hadameon, patubegehon hatuaon, mandok Debatam bangkit Raja di angka ngoluntabe.

• Pangiar tongtong soaram mamuji dohot pasangaphon Debata

Soara ni pujipujian tanda ni hamonangan do i. Songoni ma hita patandahon na margogo hita mangadopi rura partangisan on, marhite na mangendehon Tuhan i. Tama do pujianta Ibana, ala Ibana do Raja jala Sipalua hita.

Tontu nunga marulakulak hita mambege Barita Na Uli. Sungkunsungkun tu hita, lam tang do haporseaonta? Na ingkon gabe pergumulan ma i di hita. Dohot do hita pagiar soaranta mamaritahon Barita Na Uli i? Molo tangkas tahilala naung dohot hita mandai hatuaon i, antong songon dia ma hita patuduhon i dingolunta siganup ari? Parsidohot a hita mamboan Barita Na Uli tu sude jolma. Dohot ma hita mamboan Barita Na Uli tu humaliang hita. Dohot ma hita nangkok tu dolok Pangiar Soaranta. Taparhatopot ma, Debata mangiringingring ngoluntabe. Amen

7. Marende BE. 707 : 1 - 2    “Hagogoon Dohot Apulapul”    BL. 707

8. Tangiang Pangondianon

9. Marende BE. No. 452 : 1 -    “Na Ro Pandaoni Bolon I”    (P. Pelean) BL. 303

10. Tangiang Panutup 

(Molo Parhalado na Manguluhon, dipatupa ma Tangiang Pelean + Ale Amanami + Pasupasu + Amen 3 X. Molo so Parhalado manguluhon, dipatupa ma Tangiang Ale Amanami  Amen 3 x)

Nb     :     Pelean dipasahat ma tu Sintua Lingkungantabe. 

    :    Pelean tapasahat dibagasan Amplop

    :    Denggan tapasahat barita Partangian Keluargantabe tu Group Informasi ni Hurianta

    :    Manongtong ma hita “Martangiang” huhut manjamothon Hahipason

“Tuhan Memberkati”