Acara Kebaktian Keluarga
Acara Partangiangan Keluarga
HKBP JAMBI1 RESSORT KEBUN KELAPA
DISTRIK XXV JAMBI
“ JUDIKA”
“Hasintongan ni Debata na Paluahon”
“Keadilan Tuhan yang Menyelamatkan”
(U=Uluan H=Huria)
- Saat teduh
- Marende sian BE 23 : 1 -2
Jesus, hami ro dison, asa masihangoluan
Ipe roma Ho tu son, jala baen ma pardomuan
Ni tondiM tu tondinami, unang mampar rohanami
Holom rohanami be nang parbinotoannami
Molo so ro tondiMi manondangi rohanami
Ingkon Ho do paturehon dalannami sidegeon
- Votum
Marhitehite Goar ni Debata Ama dohot Goar ni AnakNa, Tuhan Jesus Kristus dohot Goar ni Tondi Parbadia, na tumompa langit dohot tano on. Amen. Luluhon ma ahu, ale Debata, jala parbadahon badangku dompak bangso na so daulat roha, sai palua ma ahu sian baoa siulahon sipaotooto dohot hajengkelon. Ai Ho do Debata haroroanni hagogoonku. Tongos ma hatiuronMu dohot hatigoranMu, angka na manogu ahu, pataru ahu tu dolok ni habadiaonMu dohot tu ingananMu. Haleluya.
Martangain ma hita. Ale Tuhan Debata, Amanami na dibanua ginjang, Parasi roha na sumurung! Na mandok mauliate ma hami tu Ho sian nasa rohanami, ala dilehon Ho AnakMu na sasada i tu hamatean humophop hami, asa unang mago na porsea di Ibana, alai asa hangoluan na saleleng ni lelengna di nasida. Tatap ma hami, ale Amanami di bagasan AnakMu Jesus Kristus, na gabe habadiaon dohot hatigoran di hami. Sai sesa ma dosanami saluhut ala ni pelean na sun denggan, na pinelehonNa i homophop hami. Sai paeleng ma pinggolMu tu tangiangnami jala asi ma rohaM di hami marhitehite AnakMu, Tuhan Jesus Kristus, Tuhannami. Amen.
- Barends sian BE 25 : 1 - 2
HataMi ale Tuhanku, arta na umarga i
Sai paian di rohangku, unang so hutiop i
Molo so be sitiopan hata na badia i,
Aha nama haojahan ni haporseaon i.
Ale Jesus sai matahon, ssi ramoti ma au on.
Asa hot haporseaon di bagasan rohangkon.
Sai paringgas ma rohangku mangoloi di hataMi,
Asa mauas di podaMu songon si Maria i.
- Epistel
Turpuk epistel sian 2 Petrus 1 : 1 – 9. Tajahama
U : Ahu surat ni si Simon Petrus, naposo jala apostel ni Jesus Kristus, mandapothon angka naung manjalo haporseaon na arga, rap dohot hami, marhitehite hatigoran ni Debatanta dohot Jesus Kristus, Sipalua i:
H : Singkop ma di hamu asi ni roha dohot dame, marhitehite panandaonmuna di Debata dohot di Jesus, Tuhanta i!
U : Dilehon hagogoon ni hadebataonna i do tu hita nasa na tau hangoluan dohot hadaulaton marhite sian naung tatanda Ibana, na manjou hita, hinorhon ni hasangaponna dohot hadengganonna sandiri.
H : Marhite sian i do dilehon tu hita bagabagana angka na arga jala na balga situtu, asa hinorhon ni i gabe partohap hamu di hadebataon, dung sanga maporus hamu sian hamagoan, na di bagasan hahipason na di portibi on.
U : Dibahen i, haringgashon hamu ma sian nasa gogo, manurdukkon denggan ni parange di bagasan haporseaon i, dung i habisuhon ma di bagasan parange na denggan i;
H : dung i pangajarion diri ma di bagasan habisuhon i, dung i habengeton ma di bagasan pangajarion diri i, dung i hadaulaton ma di bagasan habengeton i;
U : Dung i holong ni roha di dongan na dibagasan hadaulaton i, dung i holong ni roha di na saluhut na ma di bagasan holong ni roha di dongan i!
H : Ai molo jumpang angka i di hamu jala ganda, ndada loasonna hamu losok jala so marparbue, laho mananda Jesus Kristus, Tuhanta i.
U+H : Alai molo so dapot i di na deba, halak na mapitung ma i, parmata na jonok, naung lupa di haiason sian dosa, na di ibana najolo.
U : Martua do angka na tumangihon Hata ni Debata, jala na umpeopsa. Amen.
- Marende sian BE 723 : 1 + 3
Tu joloM O Tuhan sahat ma diringkon pangke ma au hombar tu lomoM,
Molo ndang Ho Tuhan, maringanan di au, diringkon ndang mararga be i.
Reff : Tung pogos pe dison manang sonang tahe marsigantung tu Ho sasude
Holan Ho huihuthon ndang be diringkon togutogu ma tu na ture
Tu joloM O Tuhan tung marpadan do au, ingkon Ho huihuthon tongtong
Ai huboto tangkas na martua do au, nang musa dohot dingolungkon
Reff : Tung pogos pe dison manang sonang tahe marsigantung tu Ho sasude
Holan Ho huihuthon ndang be diringkon togutogu ma tu na ture
- Jamita : Sepania 2 : 1 – 3
Sosososo tu hamubaon ni roha i do impola jamita on. Asa marhamubaon bangso i andorang so sahat ari ni Tuhan i. Ai molo sung ro ari i, ndang adong be na boi tarpatupa. Ndang adong be partingkian laho pature diri dohot pauba roha. Alani do umbahen na dijou panurirang Sepania hohom ma hamu maradophon Tuhan Jahowa, ai jonok na ma ari ni Jahowa. Alai nuaeng disoarahon panurirang Sepania do paboa na ingkon do pertanggungjawabhonon nasida do saluhut na ni ulanai. Ingkon mardalan do uhum ni Tuhan i, ai na bonar jala na sintong do Ibana. Paruhum na sintong jala ro ma Ibana songon panguhum. Tu sude suhi na holip pe luluan jala botoon ni Jahowa do.
Di ari i na jongjong ma Ibana songon panguhum na sintong, bonar huhut marhuaso situtu. Ingkon jongjong Ibana mangalo bangso na jahat. Angka na so olo paubahon rohana jala na sai hot dope mangulahon dosa ingkon sahat do tu paruhuman i, ingkon jaloon nasida do upa na niulana. Borat situtu do uhum na ingkon masa tu angka na so olo paubahon roha. Ndang adong na boi malua sian tanggung jawab, ai tangkas do dibahen di Gal.5:7 “unang hamu lilu; ndang olo Debata leaan!” di ari ni Tuhan i papataronna ma huasoNa, jala ndang adong na boi mangambati. Arta nang hamoraon ndang boi paluahon bangso i sian uhum pamasaon ni Tuhan i.
Molo diportibion deba halak olo do mangasahon arta, hamoraon, huaso na adong di ibana laho paluahon dirina sian jorgong, gabe hira na sintong idaon angka parjahat i, alai ndang boi masa songon i di Jahowa, ala panguhum na songon hurangkam do na laho salpu saluhutna. Molo dibege uhuman na naeng masa i, ndada asa tahutan sambing nasida, alai asa tungki do jala mardangoldangol. Tagan so songgop do pe paruhuman i, ringkot do mangalului Jahowa di bagasan unduk ni roha asa dilului hatigoran dohot haserepon anggiat tung marlas ni roha muse Jahowa mida nasida jala asa tung diondingi nasida sian rimas ni Debata. Molo ta pamanat turpuk on pola 3 hali disosohon “lului ma”. Lului ma Jahowa, lului mahatigoran, lului ma haserepon. Sian i naeng alusanta sada parsitutuon na tangkas mangalului Jahowa dibagasan hatigoran dohot haserepon. Ingkon hot do i asa nalnal hamubaon i. Molo dang dibagasan haserepon dohot hatigoran ndang tagamon adong parsitutuon laho paubahon roha. Pasti do sahat uhum ni Tuhan i tu angka naso olo marhamubaon alani gabe parsiajaran na arga ma na masa tu bangso i dihita halak Kristen nuaeng on. Asa marhamubaon hita, talului Tuhan i, talului hatigoran, talului haserepon, sotung lalu rimas ni Tuhan i tu hita. Amen.
- Marende sian BE 221 : 1 - 2
Saleleng Jesuski namandongani au,
Maporus holsoholsongki, ssi di Ibana au.
Parmahan Jesuski, birubiru Na au,
Ditogutogu tondingki, ndang be marmara au.
- Tangian pangondianon
- Marende sian BE 214 : 1 (papungu pelean)
Sonang di lambung Jesus, sonang na ro tusi;
Unang be ho mabiar lao mandapothon i!
Tongtong di jouhon Jesus:
Sai ro ma tu Au tadingkon haholomon jala haposi Au
Sonang di lambung Jesus, sonang na ro tusi;
Unang be ho mabiar lao mandapothon i!
- Tangiang panutup
Ale Amanami na di banua ginjang! Sai pinarbadia ma GoarMu! Sai ro ma harajaonMu! Sai saut ma lomo ni rohaM di banua tonga on songon na di banua ginjang! Lehon ma tu hami sadarion hangoluan siapari! Sesa ma dosanami songon panesanami di dosa ni dongan na mardosa tu hami! Unang hami togihon tu pangunjunan! Palua ma hami sian pangago! Ai Ho do nampuna harajaon dohot hagogoon ro di hasangapon saleleng ni lelengna. Amen.
(Tu namanjalo tohonan) Asi ni roha ni Tuhanta Jesus Kristus, dohot holong ni roha na sian Debata Ama, dohot parsaoran ni tondi parbadia ma na mamasumasu hita on saluhut na. Amen.
Komentar
Posting Komentar